هل نريد استخدام المسلمين كدروع بشرية ؟

هل نريد فعلا استخدام المسلمين ليلة العيد كدروع بشرية تحمينا من هول ما قد يحصل ؟ أو على الأقل تجعل منفذى الانفجارات يتغاضون عن الفكرة الشيطانية بتاعتهم دى ؟ أو أى شىء آخر ؟ 

أنا يا جماعة قرأت المقال ده على الفيس بوك تحت اسم أو عنوان توضيحات لواحد اسمه بيشوى ريمون ، فيا ريت تقروه معايا ، لانه غير أمامى مفهوم استخدام المسلمين كدروع بشرية ، وزى ما تقولوا كده حسسنى بأنانيتى المفرطة اللى ظهرت لى أنى كتبت بيها أفكارى وأرائى فى المقال السابق ، عموما نقرا المقال :

1. أرفض رفضًا قاطعًا الدعوة لحماية المسيحيين بدروع المسلمين البشرية والكلام المستفز ده.. اللي بيفجروا الكنائس دول ناس كفرة لن يردعهم وجود المسلمين.. ولو فيه عشرة هيموتوا ليه نخليهم عشرين؟ أكرر رفضي القاطع لتعريض أخي المسلم نفسه للخطر.. وإذا كانوا سيفجرون كنائس أخرى فأهلًا وسهلًا كلنا نتمنى الاستشهاد، وليمت الأقباط ليحيا المصريون

2. قناعتي الشخصية هي أن المسئولين عن هذه التفجيرات هم بالترتيب: رئيس الجمهورية محمد حسني مبارك - وزير الداخلية حبيب العادلي وذلك بالتواطؤ المباشر مع المنفذين الذين لم يكونوا ليستطيعون تنفيذ هذه العملية بدون تعاون الأمن، والغرض منه إثارة الفتنة في البلد حتى يسهل قمع الأصوات المعارضة والمناهضة للنظام وإخراس الألسنة في الداخل والخارج عن مهاجمة مشروع التوريث.. وأؤكد أنه سوف يتم استغلال هذا الحادث للقبض على كل معارض للنظام بتهمة الإرهاب، خاصة بعد تعديل قانون الطوارئ الأخير ليصبح استخدامه قاصرًا عاى الإرهاب والمخدرات

3. أعلن إدانتي الكاملة لكل من يستغل هذا الحادث المدبر أمنيًا في إخراج الكراهية والطائفية بداخله ضد الطرف الآخر سواء من المسيحيين أو المسلمين.. فهذا هو المراد، وأرفض اتهام المسلمين الأبرياء أو دينهم بالمسئولية  عن هذا الحادث الإرهابي .

4. أعلن إدانتي الكاملة لأي أعمال عنف أو شغب أو اعتداء لفظي أو جسدي أو مادي على أشخاص وممتلكات الغير، مسلمين أو مسيحيين، فهذا لا توصي به أي من الديانتين ، وأعلن رفضي لما تم من جانب بعض المسيحيين الذين أعماهم الغضب وخالفوا تعاليم دينهم من بعض صور الاعتداء على أشقائهم المسلمين في منطقة سيدي بشر بالإسكندرية خصوصًا، وفي زيارة فضيلة المفتي للكاتدرائية لتقديم العزاء، وأرجو من الإخوة المسلمين ضبط النفس وامتثال القدوة الحسنة، وضرورة تقديم هؤلاء المفسدين للعدالة

5. أحيي المسيحيين الذين نزلوا يعبروا عن غضبهم بأسلوب سلمي حضاري وهو المظاهرات، وأحيي بشدة المسلمين الذين نظموا معهم هذه المظاهرات تضامنًا واحتجاجًا، وأدين بشدة محاولات الأمن لتفريق المتظاهر المسلم عن المسيحي - وهذا يكشف النية المبيتة للأمن بخلق الفتنة - وأدين بشدة أكثر موقف بعض آباء الكنيسة من التظاهر والمتظاهرين، مسلميهم وأقباطهم

6. أهيب بالأزهر أن يقوم بإصدار فتوى بتكفير أي عمل إرهابي يستهدف الأبرياء، إبراء لذمة المسلمين والإسلام من هؤلاء الكفرة، هذا إن لم تكن فتوى بهذا المعنى قد أصدرت فعلًا

مصري مسيحي .

المقال كده خلص ، وأنا طبعا بشكر الشخص العاقل الفاهم اللى كتبه ، بس هنا بقى عاوز أقول حاجة ، فكرة أن مسلمين يروحوا الكنيسة مع المسيحيين ، دى فكرة مدونين مسلمين ونشطاء مسلمين برضه ، أنا لما لقيتهم بيقولوا كده قلت أعرض الموضوع فى مدونتى علشان نسد ثغرات قد تكون موجودة  ، وعلشان على اد ما نقدر نحمى المسلمين من بطش الأمن وأعوانه ، ولو لاحظتوا قبل كده أنا قلت المسلمين يروحوا الكنيسة علشان يعيدوا مع الاقباط مش علشان يحرسوهم ، على اعتبار ان اعيادنا واحدة ، وان اللى اتولد ده هو يسوع المسيح عيسى ابن مريم ، وده نبى فى الاسلام قبل ما يكون حاجة عظيمة عندنا .

ده حاجة الحاجة التانية بقى اللى عايز أقولها ، أنى خلاص مبقولش لمسلم تعالى معايا الكنيسة ، لايقول حد أنهم عاوزين يعملونا دروع بشرية ، احنا برضه مش عاوزين خسارة فى المسلمين ، لانه أنا واحد من الناس زى ما المسيحى أخويا ، المسلم أخويا برضه ، لاننا أبناء أم واحدة وهيا مصر ، واللى مارضهوش على المسيحى مارضاهوش على المسلم ،  بصراحة المقال ده أثر فيا جامد ، مع أن آخر خمس أفكار أنا معتنقهم من الأول ، لكن الفكرة الاولى حسستنى فعلا بأنانيتى ، وبعظم الشخص اللى كتب المقال ده ، وبالمناسبة أنا عملتله آد فى الفيس .

الحاجة التالتة بقى واللى مطلعتش بيها برة النقطة أصلا ، هو انى كنت عاوز أورى الاقباط بمجية المسلمين العيد معاهم انهم اخوات فعلا ، أو بالأحرى أفكرهم بكده ، وأنا يا جماعة صدقونى مش بقول الكلام ده كده وخلاص ، لا ، أنا اللى يعرفنى كويس هيعرف برضه ان ده مش كلام شعارات ولا حاجة ، والله على ما أقول شهيد J .

واسيبكم مع جزء تانى من قصيدة على اسم مصر للشاعر صلاح جاهين

مصر .. التلات أحرف الساكنة اللي شاحنة ضجيج
زوم الهوا وطقش موج البحر لما يهيج
وعجيج حوافر خيول بتجر زغروطة
حزمة نغم صعب داخلة مسامعي مقروطة
في مسامي مضغوطه مع دمي لها تعاريج
ترع وقنوات سقت من جسمي كل نسيج
وجميع خيوط النسيج على نبرة مربوطة
اسمعها مهموسة والا اسمعها مشخوطه
شبكة رادار قلبي جوه ضلوعي مضبوطة
على اسم مصر

على فكرة : معلش أنا حاسس أنى داوشكم بصلاح جاهين وكأنى معرفش غيره

لأ أعرف غيره طبعا ، بس هو شاعرى المفضل ( من بتوع العامية مش الشعر كله )

بالذات بعد ما قريتله الرباعيات بالطبع ، ومظنش ان فيه مصرى واحد مبيحبش صلاح جاهين

لانه فى العقلية المصرية البسيطة المحببة اليا اللى ميحبش أم كلثوم وصلاح جاهين والابنودى وعبد الحليم والناس دى بيبقى بمثابة كافر J . وده جه فى فيلم الملازم أول فرحان ( مش فاكر اسم الفيلم قوى ) بتاع حسن حسنى وياسمين عبد العزيز ، وفتحى عبد الوهاب ، لما جت سيرة الأغانى وأم كلثوم ، راح فتحى عبد الوهاب قال لحسن حسنى : لا ،  أم كلثوم مين ؟ راح حسن حسنى قال : انت هتكفر ؟ راح فتحى عبد الوهاب قال مدافعا عن نفسه وزى ما يكون بيعمل استئناف حكم اعدام J : لا مش قصدى ، اقصد ان عندنا تراث خاص بينا ، ( لانه كان فى الفيلم من اسوان )  

ملحوظة أخيرة بقى : الاستاذ بيشوى ريمون اللى كاتب المقال المشار اليه سابقا ، صفحته مش أى حد بيرد فيها أو بيشارك فيها ، علشان كده محدش هيعرف يرد عليه الا لو كان صديقه . عموما وجود واحد زى بيشوى ريمون ده بيؤكد فعلا ان الاقباط عندهم ناس عقلانيين جدا ، وبيفكروا حلو خالص ، أنا بحييه بصراحة .

عموما مع تحياتى

المحارب ضد الارهاب

محب روفائيل