مبارك انت يا أبويا الآب - شعر ديني مسيحي

 رغم العيوب والخطايا

رغم كل شيء معيب

هفضل أنا ابنك وطفلك

وانت ليا أكبر حبيب

مبارك انت يا ابويا الآب

أسبحك من كل قلبي

وليصل تسبيحي للسحاب

كقبلة على قدميك يا ربي

انت غالي عليا لكن

بتندهني كل المهالك

تيجي ف هيئة حاجة حلوة

توديني ف أسوأ مسالك

تيجي انت بحب أحلى

تقولي قوم وانهض يا ابني

تنتشلني من عذاب ف وحلة

أتأكد انك لسة حاببني

سامحتني يارب ع كل غلطة

فأشكرك يا ذا الحب العظيم

هقوم واقوم بعد كل سقطة

وافضل باصص لك زي الفطيم

في حب الآب السماوي- شعر بالعامية المصرية

علاقتي بيك مش عقيدة وطقس
ولا لازم اكون علامة في اللاهوت
ولا هامك معموديتي رش او غطس
بتحبني وابنك فداني من الموت

حاجات كتير ف دماغي متلخبطة
لكن حبك ليا الحقيقة المؤكدة
اسمع ده واقرا لده الاقيهم شخبطة
وانت سهام حبك ع قلبي متسددة

العقل قال حبك ف القلب غير محدود
وحنيني للعشرة معاك مالهوش حد
ابعد اروح اهيم اتوه اشعر ببرود
حبك حاجزني ويرجعني ماهو اعظم سد

ورجعت مرة تاني - قصيدة مسيحية

مرحبا أصدقاءالمدونة الأعزاء، اقدم لكم قصيدة دينية "مسيحية" ألفتها للتو، بعنوان "ورجعت مرة تاني" اتمنى انها تعجبكم.. 

بحب اشاور ع الخطاة اللي اولهم انا

وكأني عايش حياة قال كلها قداسة وهنا

وبكدب على نفسي كل يوم واقول اني

احسن م العشار، هه، خاطي وعلى نفسه جنى

بنسى او يمكن بتناسى خطيتي

وبقول ماهو كله بيعملها، هاهاها، يا فرحتي

وببص لفوق ساعات اه يمكن بس

بنسى اشكرك يابويا ولو حتى على صحتي

يابويا انت احلى اب في الوجود

بتعطف عليا وبتحبني م المهد للحود

رغم اني مش بفتكرك غير ف المصلحة

لكني بلاقيك وفي وباقي ع العهود

جاي لك للمرة المية بجدد وياك العهد

عارفك مش طالب ذبيحة، ولا حتى مني زهد

أنا عارف إنك عاوز بس مصلحتي

وتنقذ حياتي م الموت ضحية ف فم الفهد

يمكن برجع وابعد عنك بعد كل ميثاق

لكن ثقتي ف رحمتك ترجعني اعيش وياك

عارف انك بتحتملني بحب لابعد الحدود

ساعدني زي مافديتني اسيبلك حياتي فداك