سواق اتوبيس شاب في مرة قال قدامي ان مفيش حد مبيشربش مخدرات..
طبعا مقولة مبالغ فيها جدا.
بس انا حسيت امبارح احساس المتعة المتواصل اللي بيحس بيه شريب المخدرات لما سمعت فيلم المصير اخراج يوسف شاهين وتمثيل كوكبة كبيرة من النجوم.. واللي بيحكي فيه قصة الفيلسوف ابو الوليد ابن رشد والمؤامرات التي حيكت ضده من تجار الدين.
كل لحظة في الفيلم ده فيها جرعة كبيرة من المتعة المفيدة..
نفس الشيء بلاقيه لما اسمع افلام تاريخية أخرى او يتخللها التاريخ (بشرط تكون باللهجة المصرية مش بالفصحى) زي فيلم الكنز ١ و ٢ (بس مش بنفس حالة الامتاع بتاعة فيلم المصير طبعا) رغم اني مش من المعجبين بمحمد رمضان ... او رواية تاريخية حتى لو مش كانت بتحكي الا عن تاريخ متخيل زي روايات لوتس لمحمد سليمان عبد المالك او طبعا رواية خارطة الحب للكاتبة أهداف سويف او روايات الكاتبة سلوى بكر. ومن المسلسلات مسلسل مشرفة مثلا عن قصة الدكتور مصطفى مشرفة ومسلسل كان ابطاله جمال سليمان وليلى علوي بس مش فاكر اسمه دلوقت.
