( عندما لا يوجد هدف ، فان عملك سيكون ميتا ،
بل وبلا أدنى فائدة تذكر ،
لانه بدون أهداف واضحة ، لا توجد رؤية واضحة ،
كى تمشى على هدى نورها فى طريقك ،
لذا فبنى آدم بلا أهداف ،
هو أقل شأنا من الحيوانات . )
محب روفائيل
بمشى فى الدنيا بلا هدف
وتمشى عليا الدنيا على طول
رحت الشط صدفة لقيت صدف
رحت أجمع فيه وكنت أقول :
هدفى انى أجمعه .
قريت كتاب حلو فى مجال ما
عجبنى الكتاب قلت هتخصص فى ده المجال
وأدينى بحاول وخايف
ميكونشى ده نصيبى والآمال .
تعبان فى دنيا التردد والأختيار معايا أنا صعب
مش من كتر الاختيارات ، لأ يا جماعة ده أنا ف حرب
الاختيارات قليلة والامكانيات كذلك
حتى الاختيار مش من حقى يا رب ؟
من ساعة ما اتولدت ودنياى ماشيين بيها
وأنا مش عارف حاجة ، ولا حاسس بمن فيها
ودنيتى كأنها مش دنيتى ،
دى دنية أهلى وهما قائمين عليها
وهما مالهم هما ، حد قاللهم اختاروا ؟
حد عملهم توكيل أموره ؟
حد باعلهم حياته ، ومن جذوره ؟؟
وأدينى بعيش حياة تافهة زى بقية الشباب
شهوة وضياع ، وسنوات من العذاب
وآجى فى آخر حياتى أشوف حققت أيه ؟
أدور ملاقيش فتفوتة ، طيب يا حبيبى ليه ؟
ليه الواحد محاسش انه واحد ولا حتى نص ؟
ليه مش حاسس بكيانى ؟
ليه بكتفى بأنى على كيانات الآخرين أبص ؟
حد يقولى ليه .
أنا ضايع وضياعى أنا سببه ، بس مش كل السبب أنا
بيئتى وحياتى ومجتمعى عيشونى فى ده الهنا L
ربنا يسامحهم ، ويخلينى أقدر أسامحهم أنا
أنا عاوز أبدأ من جديد .
بس شوف عدت كام سنة .
يمكن حياتى دى مرة ، يمكن حياتى دى علقم
لكن فى حياة تانية مبفكرش وبقول دايما الله بمصايبها أعلم .
وشخصيتى بتقولى اللى تعرفه أفضل م اللى متعرفوش
مهى شخصيتى باظت منين ؟ منى أنا والباقيين
لكن حياتى اللى بحبها ، بالتشجيع ناحيتها مهوبوش
مش عارف أتلم على حياتى ، ومش عارف برضه أعيش
حاسس أنى ف مماتى ، بل موتى أفضل من انى أعيش
تايه فى بلاد الله ، حتة أتوجه ليها مفيش
وأهدافى يابا راحت ، أهدافى يابا مفيش
جاى مع الجايين ورايح مع الرايحين
وبقول بكرة تتعدل ، وبكرة فات عليها سنين
وشايف نفسى بتبهدل ، فى لحظة فى طرفة عين
عايز أنقذ حياتى ، من براثن اللاهدف اللعين
ياما كتير حاولت ، وكتير ياما لسة بحاول
يمكن كتير عقلت ، بس لمرادى مش طايل
يمكن كتير فهمت ، بس حياتى رايحة فين ؟
وعلى نفسى كتير دورت ، ولحد دلوقتى مش عارف أنا مين ؟
عازف عن الحياة الصح ، أنا عايش فى الغلط
رغم انى فى لحظتى اللى بعيشها ، مبفكرش انى غلط
عادى فى المعادى ، الناس كلها زيى عايشة
وده شادى ويا هادى ، بيعملوا زيى ، ياعم انسى
لأ بس أنا مش هنسى ، أنا جايلك يا عمو زويل
واسمى هيبقى جنب اسم جدو نجيب محفوظ
هبقى انسان طبيعى ، ناجح وكمان فعال
ومش همشى ورا الحظ . مين قال الدنيا حظوظ ؟
أنا هبدأ أبنى ف نفسى ، لغاية ما نفسى تكبر
أنا هنجح ، صدقنى هنجح ، ونجاحى أهه بيكتر
مين قالى انى ضعيف ؟ يابنى ان شا الله أنا هاقدر
مين قال انى ضعيف ؟ صدقنى ده بكرة هتحضر
ويحضر معها تحقيق الآمال
بس عاوز سهر ليالى طوال
يمكن ده صعب ، بس زويل لسة شغال
عارف أنه ف حرب ، مع الكسل والفشل
وأنا هعمل زيه وزى يعقوب
خلاص هقب ، ولحياتى أتوب
خلاص هحب نفسى وحياتى
وليهم خلاص هأووب .
مع تحياتى : محب روفائيل
أخى الكريم: محب
ردحذفالأمل هو طاقة النور التى تنير الدروب فى ظلمة الليل الطويل....
أعجبنى أسلوبك البسيط العميق.
تقبل تقديرى واحترامى
لا حياة مع الياس وبكرة ان شاء الله حيبقى احسن بولاد بلدنا الجدعان والتاريخ يشهد
ردحذفتحياتى لك يا محب وقليل من التفائل
أخى الاكبر الأستاذ : محمد الجرايحى
ردحذففعلا نحن شباب المصريين والعرب نحتاج لأمل مع العمل ، ربما أكثر من أى أحد آخر .
شىء يسعدنى جدا اعجابك يا سيدى
تحياتى لحضرتك
الاستاذة الموقرة هبة فاروق : -
ردحذفلا يأس مع الحياة هى الصح ، لان كلام حضرتك بيقولى انى أعمل زى البو عزيزى بمقولة لا حياة مع اليأس :)
آسف لكن لزم التوضيح ، وهو خيانة أحد التعابير ربما .
نعم يجب علينا التفاؤل فى هذه الأوقات
تحياتى وشكرى لحضرتك .
حاسس أنى ف مماتى ، بل موتى أفضل من انى أعيش
ردحذفايه يا ابنى الياس والتشائم ده
فين الامل ..
ارمى حمولك واطلب المعونه الالهيه
ربى يحافظ عليك
هههههه
ردحذفمرمر
ما أنا رجعت وقلت هيبقى عندى أمل وهعمل بجد وهسهر
بس أنا عاوز دافعة بجد
أو زى ما بيقول بتاع الفيزياء عندنا ( impulse )
أخ لو تتحقق أحلامى ؟
أنا نفسى أدرس آداب بره فى أمريكا
وعاوز أتخصص فى الخيال العلمى اللى مفيش حد بيهتم بيه فى مصر :)
نفسى يا رب
وهتبقى فلة بجد ، عموما أروح أمريكا هجرة شرعية ، وهدرس هناك ومش عاوز فلوس من اللى هعملها طبعا ، المهم انى أدرس الخيال العلمى وأكون بنى آدم بقى .
هرمى كل اتكالى عليك ( يا رب )
بس أنا مش عارف ليه كل أخواتنا المدونات ( اسم فاعل مؤنث وليس على الموقع نفسه :) بتقول ( ربى ) ، هو فيه ايه ده رب الكل :) ودى حاجة لاحظتها من زمااااااان :)
شكرا يا مرمر على الدعوة
وربنا يبارك فيكى