محدش فاهم حاجة ، ومحدش عاوز يفهم ، والكل بعدم فهمه هيودى مصر فى داهية .
أنا كنت مع الثورة ، من أول يوم . والحمد لله ، جبنا مكاسب مكناش نحلم بيها ، ليه عاوزين تخربوها بقى؟ أنا مش ضد اللى عاوز يتظاهر تانى ، لأن ده حق ديمقراطى مكفول للجميع شرط ان يكون التظاهر ده سلمى ، بس بقول شغل عقلك شوية ، هتستفاد أيه لما الريس يتنحى وممكن تخسر أيه ؟ عموما كلهم ست شهور ، استحملتوا 30 سنة ومش قادرين على 6 شهور؟؟؟؟؟؟ رغم أنهم جايين مملوئين بالتفاؤل ؟؟؟
الكلام ده كتبته ك ( بوست ) فى الفيس بوك ، وبعديها على طول قريت الكلام اللى جاى ده مرفق معه صورة مكتوب عليها أرحل يا مبارك وصورة الريس طبعا ، أما الكلام فأهه
عزيزي المغفل
, تحية طيبة و بعد
اذا كانت احد أهدافك لوقف المظاهرات هيه
فرصة تانية .. البلد هتخرب .. الامان .. دول أجنبية
... يبقى يا ريت تقرا لحد الاخر
عزيزي المغفل .. أنا برضه مغفل .. كنت زمان بقول اني
انسان .. مسلم .. مصري .. عربي
اكتشفت اني لو حبيت أمارس شعائر الاسلام و أصلي الفجر و أربي دقني هيعتقلوني
و لو حبيت أعمل فيها مصري و خايف على الوطن و أحارب الفساد برضه هيعتقلوني
و لو العرق العربي نفر و قلت فلسطين أو تونس برضه لازم يعتقلوني
و لو طالبت بأبسط حقوقي الاّدمية : هواء نضيف .. ميه نضيفة .. أكل نضيف .. مسكن و جواز
مش بلاقيها .. و لو اعترضت عشانها برضه هيعتقلوني
عزيزي المغفل .. تسمح تقولي احنا ايه ؟؟؟؟؟؟؟؟
ايه هيه هويتنا ؟ لازمتنا ايه ؟ عايشين ليه ؟
عزيزي المغفل .. ياللي فرحان بخطاب الرئيس و شايف انه كفاية
يعني - بفرض انه هينفذه - مش غرييييييييب شوية يعني اننا لازم نموّت مننا ييجي 500 واحد
عشان البيه يبدأ ينطق و يحس ان فيه - لا سمح الله - شوية فساد
و بتقول نديله فرصة تانية !!!!
اه صحيح .. عندك حق .. ما الراجل - - ماباقالوش غير 30 سنة بس في السلطة
يعني كان هيلحق يعمل ايه ؟؟ ده الواحد على ما يفطر و يشرب الشاي بياخدله 5 سنين
عزيزي المغفل .. ياللي بتقول كده البلد هتخرب .. و السرقة و النهب و عدم الامان
ده أنت مغفل جدا
حادثة واحدة من حوادث الفساد زي حادثة العبارة مات فيها اكتر من 3 أضعاف اللي ماتوا في الاسبوع ده
و السبب في موتهم سافر بره و همه سابوه عشان تبعهم
عزيزي المغفل .. هوه انت فعلا كنت عايش في امان ؟؟
انت كل اللي كنت بتعمله انك بتطبق قاعدة " يحدث للاخرين فقط
يعني انت بس مش متخيل
ان اخوك يموت في عبّارة
او اختك تولع في القطار
او امك و ابوك يتهانوا و يتبهدلوا من أي امين شرطة مايسواش 3 مليم
او جوازتك تتفركش عشان عز بيه محتكر الحديد
او حد قريبك ينتحر لانه لا لاقي شغل ولا عارف يتجوز
او يمكن مش مدرك ان موقفك من القضية الفلسطينية ممكن يتغير عن كوننا ولاد عم اليهود
و اللي ينكسف من بنت عمه مايخدش منها ريال
او يمكن باصص للحظة دي بس يعني مش مفترض انك هيجيلك
سرطان من المبيدات المسرطنة
او فشل كلوي من الميه الملوثة
او على المدى القريب ممكن تنضم لضحايا وباء اسفكاسيا الخنق - افتكاس يا - و ده لو حصل
سوء تفاهم مع المخبرين اياهم
او لو حظك وحش شوية ممكن يضطروا يعزبوك لحد ماتموت
انت ليه مستبعد انك يحصلك اي حاجة من دول ؟
همه اللي حصلهم كده ماكانوش مصريين زيك ؟ ماكانوش بني ادمين زيك
اراهنك كمان انهم كانوا مستبعدين الافكار السوداوية دي زيك تمام
عرفت انت ليه مستبعد الحاجات دي ؟؟ معرفتش ؟ عشان مغفل
عزيزي المغفل .. ياللي شايف ان فيه ديموقراطية و حرية رأي
فيه فرق بين حرية الرأي و تسفيه الرأي
الموضوع ببساطة ان رأيك مالوش وزن طالما همه المتحكمين في كل حاجة
خلاص يا حبيبي اتكلم و ألطم و اشتم و عض في الارض
هل ده هيقلل من فلوسهم ؟ هل ده هيقلل من نفوذهم ؟
يبقى هيتعبوا نفسهم و يمنعوك ليه ؟
هيه المشرحة ناقصة قتله ؟
عزيزي المغفل
لما يكون نظام فاسد و متخلف
و تعمّد اثارة الفوضى عشان الناس تقول خلاص رضينا بيه
و يمسكوا امناء شرطة بيحاولوا يسرقوا
و ظباط بيحاولوا يقتلوا و يحرقوا في زي مدني
و بلطجية و هتيفة مأجورين من الحزب الوطني و مجلس الشعب بهدف قتل و ضرب المتظاهرين
حتى بعد الخطاب العظيم للرئيس و ده يدل على مصداقيته الشديدة
و بعد كل ده نقول نديله فرصة تانية 6 شهور
و نسيبه يعدل اللي هوه عايزه من الدستور حسب رؤيته العظيمة
يبقى تقدر تقول و بكل فخر : أنا مغفل جدا جدا جدا
و تكون دي هيه هويتك .. و من حقك تموت في سبيل افكارك
أنا قريت الكلام ده ، وحسيت أنى لازم أوضح حاجة .
مبارك زى أى حد أو أى بشر أو أى زعيم له أخطاؤه
هنروح بعيد ليه السادات وناصر ليهم أخطاؤهم كذلك مبارك
المشكلة أنه الكلام اللى جه فى المقال اللى فات ده كله زى ما أنتوا عارفين احساس بالظلم والقهر والقمع
ولكن .........
هل فيه حاجة فيه على مبارك ، مظنش ، يا جماعة فيه فرق بين وظايف ومسئوليات الريس ووظايف ومسئوليات تابعيه
الأخطاء دى كلها أخطاء تابعيه ، يمكن غلطه الوحيد فى الكلام اللى فات ده كله هو أنه معرفش يختار صح ، ده لو كان هو اللى بيختار يعنى .
حاجة أخيرة بقى علشان أروح أنام بعد مناوبة الحراسة اللى قمت بيها : -
يا ريت مبارك ميتنحاش ، أنا لما قريت فى البى بى سى أنه أوباما أمر مبارك بتداول السلطة سلميا الآن وكانت كلمة الآن بين قوسين ، حسيت أنى خنجر اطعن فى بطنى ، يعنى أحنا والحمد لله مالناش كرامة بين الشعوب ، وكرامتنا فى الطين للدرجة اللى تخلى أوباما يقول لمبارك ويملى عليه أوامره ، راح مبارك رد عليه وقالله أنت لا تفهم ثقافة المصريين والفوضى التى ستتخلف لو أنا أتنحيت فى الوقت العصيب ده ، مع احترامى لأوباما ، لكن أنا لو كنت مكان مبارك وعندى شجاعة كافية كنت تفيت عليه عبر الهاتف .
أه ما أحنا شعب ميعرفش غير الضرب بالجذمة والتف عبر الهواتف .
اسم الله عليك شعب ضعيف .
يا رب حافظ على مصر
وكلمة عن مبارك لمحاولة توصيفه مش هقولها المرة دى ، لانى منعنس جدا ، هقولها المرة الجاية. لكن ،،،،،،،،،،،
يا رب حافظ على مصر
مع تحياتى المحب لكم دائما
محب
عارف يا محب انا مشفتش اسمك من فترة فقلت ادخل اطمئن عليك لقيت البوست قلت خلاص يبقى بخير الحمد لله , اما رائي فمش وقته لكن عايز اقلك ان الشباب لما كملوا يوم واحد بس بعد ما اجتمع عليهم ناس كتير وقالولهم كفاية كده يوم واحد بس كان فيه 5 وزرا , واحمد عز و4 مساعدين لوزير الداخلية في السجن علشان يدفعوا التمن وفاضل المجرم الكبير اللي كانوا بيعملوا بتوجيهاته . اما موضوع اوباما انا اضايقت لان احب ان حقنا ناخده احنا مش جد يجيبه بس هوه لو بيسمع شعبه مكنش اتجرأ عليه بتوع جوانتانمو لو كان ساب خير غير العاطفة بتاعة المصريين كان زمانهم كلهم على قلب رجل واحد بيقولوا وراه لا لاوباما اماانها حسابات بينهم وكارتهم اتحرق دي مشكلتهم مع خدامهم لا تعنينا في شىء وتدخل خامنئي في الخط ينم عن غباء شديد اذا كان بيدعم طرف بعينه او غباء عادي اذا كان بيقول كده من نفسه
ردحذفواحد من الناس :-
ردحذفشكرا جزيلا يا دكتور على محبتك ، فى الحقيقة أنا دخلت النت أول ما فتح ، لكن معرفتش أقول أيه ، فقعدت يوم كامل أسمع لمحللين سياسيين وصحفيين حياديين علشان أعرف موقفى وأستنبطه من كلامهم وتحليلاتهم .
حركة اعتقال الكبراء وتجميد أرصدتهم فى البنوك ده مؤشر كويس وايجابى على فكرة ، ورغم انى بأيد مبارك دلوقتى الى حد ما ، لكن يجب انه يحاسب على أخطاؤه برضه ، المفروض من هنا ورايح محدش يبقى فوق القانون .
علاقة مبارك بأوباما للأسف مش وحشة فى حقه بس ، لأ دى وحشة فى حق جميع المصريين ،
عموما ربنا يستر ، المظاهرات النهاردة فى قمة السلمية ودى حاجة ايجابية .