تسمع كل شوية والتانية فى منتديات كتيرة حاجة اسمها حوار الاديان ، ودى حاجة تظهر ولاول وهلة أن القائمين على المنتدى ناس مثقفين وبيحاولوا يقاربوا بين الافكار أو حتى بين الديانات وأقصد هنا الاسلامية والمسيحية ، أو حتى ناس كل واحد فيهم عايز يتعرف على دين التانى علشان يشوف مين الصح دينه ولا دين التانى . كمان ممكن علشان يثبت للطرف الآخر أيهما الاصح مبينا أن دينه هو الصح والآخر كله ضلال . وهذا جيد فى حد ذاته . لكن أول ما تدخل مناقشة فى أى منتدى من الموجودين على الساحة العربية هتلاقى كلام زبالة وهتعرف أنه حتى مفيش أدب حوار بين الطرفين وده يشتم فى ده وده يشتم فى نبى ده ، والشتيمة تصل للرسل كلهم وكأن الحكاية شوية شتامين بيشتموا ويسبوا بعض فى النت وخلاص وهما مستمتعين بكده ، أو يمكن أن الشتايم دى بتحسسهم فعلا أنهم بيحبوا دينهم وانهم متحمسين له جدا ، أو يمكن واحد مراته ضارباه علقتين سخنين أو يمكن تلاتة وجه يفتح النت معرفش يفش غلبه غير فى مواقع حوار الحيوان قصدى حوار الاديان
وعشان بقى أنا واد بفهم ، هجيبلكم الحكاية من البداية ومش هقعد أقول حوارات الانترنت والكلام الفارغ ده ، الا بعد لما أجيب الطرق الاولى أو البدائية لحوار الحيوان واللى للاسف لسة قاعدة عندنا كعرب ولسة ماتعافيناش منها لغاية دلوقتى .
انك تكتب حاجة على حيطتك سواء مقدس أو حاج أو الرسول أو المسيح أو تطلع كام قالب من بيتك نص طوبة على هيئة هلال أو صليب ، ده حق مشروع ليك لانه ملكية خاصة ليك فيها حق التصرف ، وان كنت هتعمل حاجة زى كده ، أرجوك ( ولا أرجوك ليه يا عم أنا مالى ) أنصحك أنك تعملها بطريقة جمالية جذابة . لكن أنك تعملها فى ملكية عامة دى حاجة فعلا بتدل على تخلفنا كعرب او كمصريين خصوصا لان العرب دلوقتى فيهم دول بقت بتناطح السحاب فى أفكارهم وقيمهم وحاجات تانية كتير مفتقدينها المصريين .
ربنا فتح علينا فى البلد اللى فى نص مصر بالظبط ،( أقصد أسيوط طبعا ) وعملولنا فى قريتنا مدخل جديد نوفى لسة مشتريينه J المهم يا ريس المدخل ده لمبة راحت وقعت منه فى أول اسبوع وقلنا مش مشكلة لمبة ، لكن بقى اللى زعلنى أكتر أو يمكن ضايقنى أن المبنى ( مدخل القرية ) بعد ما أتبنى بأسبوع أو يمكن أسبوعين ، راح أيه اللى حصل يا سيدى ؟ شفتلك وأنا فى العربية المدخل وهو غرقان فى السواد بطريقة بشعة فعلا ، طبعا استغربت ، لان فى نفس المكان فيه يافطتين : واحدة بتقول مرحبا بكم فى ريفا والتانية بتقول آثار ريفا . لو جه سائح دلوقتى ولا حاجة أول ما هيشوف المبنى الجديد اللى بقى زبالة هينهى رحلته فورا .
المهم أنه اللى كان مكتوب للأسف كلام مقدس جدا سواء كان بعضه مقدس للمسيحيين أو كله مقدس للمسلمين ، وهو ما قد ينكره بعض المسلمين . اذ كان مكتوبا سبحان الله وبحمده سبحان الله العظيم وبعض الآيات القرانية الآخرى ، بالاضافة الى أحاديث وكلام اخر كمثل الدين عند الله هو الاسلام وما شابه . وكان مكتوبا بالمداد الاسود وبخط هو الرداءة نفسها ، أصل الكلام المكتوب لو تلاحظوا العربيات اللى بيبقى معمول عليها خمسة وخميسة بالدم ؟ أهه كان زيها بالظبط مع اختلاف اللون بالاسود .
عموما أكتشفت حاجة قريب . ان الكتابة على الممتلكات العامة مش من صفات فئة معينة من الشعب وبس لأ ده جميع الفئات الدينية ، يعنى فى مدرج الكلية عندنا فى حاسبات أسيوط . لقيت مكتوب على الخشب شوية كلمات مسيحية وبنفس الرداءة اللى اتكتب بيها الكلام على الحيطان بتاعة مدخل البلد ، زى يسوع هو الله ، وكل الذين قبلوه أعطاهم سلطانا أن يصيروا أولاد الله أى المؤمنين بأسمه ، ويسوع يسوع الهنا ومخلصنا وJesus is my love وi love you jesus أما الرد عن هذه الكلمات فكان على نفس الخشبة كالآتى : واحد كاتب عيسى ابن مريم هو رسول الله وواحد جه فى أخر جملة يسوع المسيح هو الله ومسح لفظ الجلالة الله ، وواحد تانى كاتب لا اله الا الله محمد رسول الله ، أما بقى الردود اللى تضخك فعلا واحد كاتبلك go a head و rock on والتى وجدتها منتشرة بعد ذلك كثيرا ولا أدرى حتى معناها لغاية دلوقتى وواحد كاتب c++++++ ودى مادة عندنا بس اسمها c++ مش كمية ال + المكتوبة دى ، أما بقى فعلا الردود اللى تهلك من الضحك فواحد كاتبلك fuck me وأنا اسف أنى كتبتها بس هو فعلا مكتوب كده والتانى كاتب كلمة أخف شوية وهى sex
عموما دى شوية حوار حيوان والمرة الجاية لو الله طول فى عمرى ، هجيبلكم جرعة تانية بس قولوا يا رب ماتشلش ( مايجينيش شلل يعنى ) من الحاجات اللى هتقابلنى وتقابلكم
***********************
ملحوظة : -
ردك على الموضوع ده هيعكس الى مدى كبير حاجتين أساسيتين ممكن يكونوا مع بعض أو منفصلتين الاولى هى البيئة الثقافية اللى انت عشت فيها ،أما التانية بقى وهى دينك ، ولو كان الرد مش حلو يبقى أظن كده بتسىء لدينك . وده بيفكرنى بمسلسل سارة اللى مثلته حنان ترك مع أحمد رزق ساعة لما قالت الشتيمة بتلف تلف وترجع لصاحبها تانى . أنا بقول الكلام ده مش عارف ليه ؟ لانى مش شايف نفسى غلطان فى حاجة ، ولو كنت غلطان سهوا أو حتى عمدا . مش هقول قولولى خطأى على الايميل الخاص لأ قولوه على الملأ بس يا ريت بطريقة محترمة مهذبة ، وشكرا جزيلا لكم .
***********************
مع تحياتى : -
الكاتب محب روفائيل
ليست هناك تعليقات:
إرسال تعليق