في جروب الدفعة الخاص بدراساتي العليا لعلوم الحاسب اليوم سأل شخص اتضح انه واحدة ست فيما بعد السؤال التالي:
جماعة سؤال خارجي شوية لكن مهم وضروري، حد يعرف مكتبة كبيرة في القاهرة فيها كتب دين صحيحة وأصلية، كتاب الإنجيل وكتاب التوراة
انا كنت بفكر متكلمش لكن كلمة صحيحة وأصلية استفزتني فخليتني اتكلم، ورديت كدة:
الكتاب المقدس عبارة عن ٦٦ سفر وهو جزئين، الاول ٣٩ سفر هما اسفار اليهود واحنا كمسيحيين مؤمن بحرفيتهم تماما (اي اننا لا نطعن في صحتهم ولا نؤمن بتحريفهم بل نصلي بهم في كنائسنا ولهم نفس قدسية الكتب المسيحية) اول ٥ اسفار منهم هما التوراة وفيهم كمان المزامير اللي بيطلق عليها اسلاميا لقب الزبور، ودول كلهم كانوا قبل ميلاد المسيح، بعد كدة نيجي لكتب العهد الجديد ودول اللي اتكتبوا بعد حياة المسيح وعددهم ٢٧ واول ٤ اسفار منهم هي الاسفار اللي اتسمت بلفظة الاناجيل وهم متى مرقس لوقا يوحنا، بعد كدة سفر تاريخي وهو اعمال الرسل واسفار أخرى عبارة عن رسائل رعوية ثم سفر الرؤيا اللي بيتنبأ عن المستقبل... كل الاسفار دي هتلاقيها في كتاب واحد موجود عند كل المسيحيين في البيوت والكنايس. اكتر حتة مؤكد موجود فيها الكتاب المقدس هيا دار الكتاب المقدس، اظن ف القاهرة في كذة حتة منهم ش الجمهورية مثلا، لأني كنت بشوف العناوين ف نهاية الكتاب المقدس ومنهم العنوان ده، فالمهم كل اللي عاوزه مختصر في الكلمات التالية: عاوز الكتاب المقدس بس يكون عهدين القديم والجديد، اظن تمنه ٢٥٠ او حاجة مقاربة
وكنت ساعتها وصلت البيت رحت رفعت الصورة دي وفيها العناوين:
الكتب مفهاش اي اختلاف، انا اتعلمت يوناني قديم مخصوص وطبعت اقدم نسخة يوناني موجودة، اللي هيا اللغة اللي اتكتب بيها العهد الجديد وهيا مطابقة للخمس ترجمات العربي والترجمات الانجليزي و الفرنساوي اللي معايا
ففيه حد من الزملاء، قال للزميلة صاحبة السؤال ان الانجيل محرف ولا يجوز الاطلاع عليه والحوار ده، أنا كنت ساعتها باكل فملاحظتش غير متأخر، وفي أثناء ذلك هي قالت له إنها بتعمل بحث ديني علمي ولسبب شخصي، وإنها احتراما لمشاعر زمايلها المسيحيين مقالتش عنوان البحث، فأنا قلت لها:
العفو، شكرا لذوقك بغض النظر عن عنوان البحث او محتوياته، بالتوفيق لحضرتك
ورجعت وقلت لزميلنا المضحوك عليه (مشيها مضحوك عليه مش كذاب):
بس للاستاذ اللي بيقول انه تم تحريفه، فيه يافندم الاف الشهداء ماتوا عبر العصور لتخبئة والحفاظ على الاسفار المقدسة من الحرق والتدمير.. الله اللي كتبهم قادر على الحفاظ عليهم، ف ليه نصف الله بالضعف والتقصير ولو ضمنيا، اله لم يحافظ على كتبه غير جدير بالعبادة اصلا
طبعا الجروب اتقفل والرسايل اتحذفت وانا كنت عارف ان ده هيحصل فقلت أبعتهم لنفسي قبل ما يتمسحوا، ونشكر ربنا، جبتهم هنا لكي أشهد للرب، وأنشر كلمته المقدسة.
المسلم يعتقد أن التوراة تم تحريفها و الإنجيل كذلك، كما يعتقد أن الإنجيل الصحيح يحتوي على الدعوة المحمدية أو الإشارة إليها.
ردحذفبكل الأحوال قد تختلف الترجمات و لو بشيء بسيط و المسلم يتعلق بذلك.
ما يهم هو أخلاق الشخص في التعامل مع الآخرين بغض النظر عن معتقده.
الدين شيء أساسي في حياة الفرد، لذلك لابد أن الانسان يختار الدين الصح اللي يسعده في حياته وبعد مماته أيضا..
حذفويكون كمان مش مضر لمن هم حوله إن لم يكن يفيدهم بالفعل..
حذف